Cain in Abel haza, ama tung hehin thagum hatna tawh a suamlup hang, ama khanggui zangh in Zeisu Christ hong suak tuanlo hi. Ama khanggui khempeuh si mangin leitung maitang pan bei siang khin zo lai hi. Ei thagum hatna, ei sinphatna, ei ngaihsut tawm thu tawh a kigual zo, nuam a kisa cih bang ahih loh lam kilangh hi.
Noah in a zukhamna pan in a tupa nangawn samsiat lawh kha liang hi. Zu na khamlo zenzen hileh hi bang thu hoih lote piang lo ding hi. Zu pen hoih hi, hoih lo hi cih ahih pah loh hang zu hangin siatna piang thei cih bel kimu hi.
Abraham in Pasian ii hopihna za khin napi, leitung taksa tawh khuak zangh in a gamtat khialhna pan leitung a nawngkai sak zo a kilem lo khanggui hong piang hi. Pasian ii zia ngak zolo aa mihing ngaihsut tawm tawh kikhial thei hi.
Abraham in a zi pen a sanggamnu ci aa zuau a khem mah bangin a tapa Isaac in zongh a pa mah suun aa, a zi pen a sanggamnu mah ci-in zuau na phuak leuleu hi. sakhi a pi san, a no san cih bang dan ahi mai diam.
Jacob in a pa a khem mah bangin a pu Laban ii khemna zongh a man thuakkik kha veve hi. Tua bek thamloin a tate khemna zongh na thuak kha beh lai hi. Joseph pen si ci-in a sanggamte in a pa Jacob khem uh hi. A vawh bangin atkik kha cih bang dan ahi mai diam.
Judah in a monu tungah a kamciam peel ahih manin a monu in amah leh khemkik aa, a monu tawh ta neih lawh hi.
Jericho khua aa numei kizuak nu in a galte (Pasian mite) matna thahna a thuak nading panin na honkhia hi. Hih bangin hotkhiatna pen a honkhia ziau hilo aa luangkham ahi hi. A zenzenin a selsim lam kithei hileh thatna thuak ding hi. Hih bangin thupha a bawlna pan Salmon tawh kiteng kha in a suan a khak sung pan Topa Zeisu hong suak hi.
Naomi in a tate a sih mang khitciang a mote a nungsang vuah a ciahkik dingin sawl hi. Ruth lo buang a mo dangte ciahkik uh hi. Ruth ahih leh Moab minam hi aa a teknu tawh zongh minam kibanglo uh hi. Ahi zong “na paina-ah ka pai ding aa, na giahna-ah ka giak ding hi. Na mite keima mite hi ding a, na Pasian keima Pasian hi ding hi” ci-in a teknu nusialo hi. A teknu sawl bangin lo ah an tawmin a omna pan lo neipa Boaz in meigong khat ahih hang tenpih hi. Boaz tawh a ngah suanlekhak sung pan Topa Zeisu hong suak hi. Noami pen Boaz tawh tanau ahih hangin innkuan khat hilo hi. Ahi zong Ruth hangin Boaz tawh innkuan khat suak kha hi.
Kumpi David in mawhna khialhna tampi a neih hangin a kisikkik pahpah khat hi. Tua kisikna in Pasian lungtang tuak hi.
Solomon in Pasian awi loh tampi a sep khakna hangin Pasian in a tapa hun ciang a minam pih, beh dangte ii langpanna thuak sak hi. Solomon in Pasian maipha a muh loh manin Israel gam phelnih suah dingin Pasian in geel hi. A pa hoih lohna hangin a ta in thuaklawh hi. Makai khat hoih lohna hangin gambup in thuaklawh hi.
Rehoboam in phiangsiah tam ngenlua aa, a mipite lungkim lo uh hi. Phiangsiah khiap ding a nget uhhang khiap sak nuam lo ahih manin mipite in langpan uh aa a gam phel nih kisuah hi.
Mary in a maizum ding theipipi, thumanna tawh kizo tak aa, a kiphal manin Messiah ii hong suahna tonu suak kha hi.
Topa Zeisu in bawng ankuang sung ah kisial in kiniam khat tak aa hong suakna tawh khanggui hoih lo pen khanggui manpha suah hi. Khuaneu khat khua gina suah hi. Khua hoih lo mi hoih lo lak ah itna lakin na lamdang thupha bawl hi.
