Khanggui hoih lo tampi a kizom suksuk sung pan Zeisu Christ hong suak ciang, tua khanggui pen a manpha khanggui hoih, a hampha khanggui thupi hong suak hi. Mihing pen kuakua ahi zong kicing cih bang om het lo cih kilangh hi. I nuntakna ah hoih lohna vive tawh a kidim kha phial zongin i sung ah Zeisu hong suak leh i nuntakna in manpha in hoih hi. Mite bangin muanlesuan ding ulenau sansggam thupi i neikei phial zongin i sung pan Zeisu hong suakkhiat aa leh a hampha, a thupi ihi ta hi. Samsiatna, maizumna, mindaina le mawhna khempeuh thupha in hong hei sak pen Pasian Hehpihna a liatluat hang bekbek mah ahi hi. I sung ah Zeisu paai in i nuntakna ah i suakkhiat sak ding kisam hi.
Bethlehem khua pen khuaneu khat hi. Ahi zongin tua khua ah Topa Zeisu hong suah ding ciangin Bethlehem khua pen “Khuaneu khua ginalo na hikei hi” ci-in na kigen hi. Bangmah i hih loh hangin i sung pan Zeisu Christ hong suak naak aa leh a ginalo i hi nawnkei ding hi.
Nazareth khua pan Topa Zeisu khangkhia hi. Hih Nazareth khua pen misia mi hoih lo tampi a omna khua khat ahi hi. Banghang hiam cih leh Nazareth khua ii nisuahna lam ah sehnel gam omin, nitumna lam ah tuipi om hi. Tua ahih manin leilu leitaw kizopna lampi in Nazareth khua nawk hi. Nisuah nitumna gamte pan Egypt (Africa) gam lam ahi zong, Egypt (Africa) gam pan nisuah, nitumna lam ahi zongin kizopna khempeuh in hih Nazareth khua a nawk kul hi. Hih gam tampi, khua tampi kizopna lampi hangin Nazareth khua ah khualzin mi tamin, minam kim aa ngeina kim hi. Sum zongh a tamna khua khat hi aa misia mi hoih lo zongh tampi om pah hi.
Hih bangin khua hoih lo sese pan Zeisu hong khangkhia hi. I nuntakna, i pilna, i sumbawlna a hoih lo sung tektek mah pan Zeisu in na lamdang hong semkhia nuam hi.
